16. - 20. oktober 2023.
Berlin blir av mange rekna som den mest spennande storbyen i Europa. Dette er lett å skjøne, på grunn av byen si svært interessante historie og det rike kultur- og musikklivet.
Vi er så heldige å ha med forfattaren Edvard Hoem på turen. Han er ein av dei aller fremste forfattarane i Norge i dag, og i tillegg er han ein sjeldan god formidlar. Hoem tek dagleg for seg emne frå sitt eige forfattarskap som er relaterte til tyskarar og Tyskland, som Mors og fars historie, Frøken Dreyers musikkskole og Med Bjørnson i Europa. Han kåserer elles om diktaren Nordahl Grieg, som omkom i eit fly over Berlin under krigen, og vi besøkjer minnesmerket over han. Den siste dagen snakkar han om den store tyske dramatikaren Bertolt Brecht, og Hoem har sjølv omsett Det gode mennesket frå Sezuan frå tysk til nynorsk.
På turen fokuserer vi gjennom guiding på keisartida, nazismen og 2. verdskrig, i tillegg til den kalde krigen og delinga av Tyskland. Vi organiserer besøk til kunstmuseum og historiske museum. I tillegg ordnar Fotefar billettar til ein opera eller klassisk konsert.
Historikaren Rasmus Sunde er guide på vandreturane i Berlin, og Lars Nes, med sin musikkbakgrunn, tek seg av musikkprogrammet og ein del guiding elles.
