9. - 13. november 2023.
På 1900-talet og fram til i dag har spenningane mellom aust og vest i Europa ført til mange alvorlege konfliktar og krigar. Berlin har på fleire måtar stått i sentrum for denne aust/vest-spenninga gjennom keisartid, to verdskrigar og nazismen, i tillegg til den kalde krigen og delinga av Tyskland. Etter oppløysinga av Sovjetsamveldet og innføringa av demokrati i landa i Aust-Europa, rådde det optimisme i verdsdelen vår. Utviklinga i Russland under president Putin har gått i svært negativ lei med annekteringa av Krim og invasjonen i Ukraina. På nytt er Europa inne i ein frykteleg krig som ein ikkje ser enden på.
På seks forelesingar tek historikaren og den kjende journalisten Hans-Wilhelm Steinfeld oss gjennom dette turbulente hundreåret i europeisk historie. Som korrespondent har han i mange år levd svært tett på fleire av dei dramatiske hendingane i Europa dei siste 40 åra. Gjennom forelesingane får vi servert dei store historiske linjene i europeisk historie og kjem også nær inn på hendingane gjennom guiding og ekskursjonar. Vi skal også merka oss datoen første dagen i Berlin. 9. november i 1918 abdiserte keisar Wilhelm. Under den såkalla krystallnatta 9. november 1938 øydela nasjonalsosialistane synagogar, jødiske butikkar og husvære, og 9. november 1989 fall Berlinmuren.
