Etter ein god frukost blir det historisk byvandring med Rasmus. Vi startar på Alexanderplatz og går inn på Karl Liebknecht Strasse, kikkar på det 365 meter høge fjernsynstårnet og den gamle Marienkyrkja frå ca. 1280 før vi går litt vidare og besøker Berliner Schloss. Dette storfelte palasset er rekonstruert i pakt med det gamle slottet frå 1451. Det vart nytta av tyske kongar og keisarar fram til 1918, men vart fullstendig øydelagt under krigen. I dag husar slottet Humbolt Forum, som er eit fantastisk flott museum for verdas kulturarv. Dei fleste av utstillingane har gratis tilgjenge, og her er fleire koselege kafear og restaurantar.
Vi går så over Slottsplassen og gata til Lustgarten, hagen eller den opne plassen framfor Alte Museum. Vi er på Museumsinsell , ei øy skapt av dei to elvefara til Spree. Denne øya inneheld verdas største museumskompleks og er på UNESCO si verdskulturarvliste. Blant anna viser vi og fortel om dei ulike musea som Neues Museum, Alte Nationalgaleri, Pergamonmuseum og Bodenmuseum.
Like ved Lustgarten ligg Berliner Dom. Dette er den flottaste og viktigaste kyrkja i byen. Keisar Wilhelm II la ned grunnsteinen, og kyrkja vart bygd i nybarokk stil i tidsrommet 1894-1905. Kopparkuppelen er 98 m høg, og kyrkja har eit imponerande og rikt dekorert interiør. Vi stoppar opp her, og blir med på ein orgelandakt.
Etterpå er det tid for lunsj på eiga hand, og vi foreslår at vi går samla den korte vegen til ein av restaurantane på Humbolt Forum. Guidinga held så fram gatelangs over den vakre og rikt dekorerte Schlossbrücke til vi kjem inn på paradegata Unter den Linden, der vi ser og høyrer om dei ruvande bygningane som Zeughaus (Deutsches Historisches Museum), Kronprinzenpalass, Neue Wache, Humboldt Universitet, Staatsbibliothek, ryttarstatuen av Fredrich den store og andre attraksjonar.
Til slutt kjem vi inn til Pariser Platz, og vi høyrer om Brandenburger Tor, som er like viktig for tyskarane som Triumfbogen er for franskmennene. Før vi avsluttar guidinga, går vi den korte vegen til Riksdagsbygningen, som er sete for den tyske riksdagen, først i tidsrommet 1894 til 1933, og så etter Tysklands samling frå 1991.
Ettermiddagen på eiga hand. Vi vil foreslå ein tur med ein guida busstur rundt om i sentrum av Berlin eller vere med Rasmus til det gode DDR-museet der billetten kostar rundt 10 Euro.
Om kvelden blir det fellesmiddag på ein god restaurant. Der får vi eit lokale for oss sjølve og underheld kvarandre med historier og allsong.
(F, M)
