4. - 7. september 2023.
Turen er open for alle.
I fire dagar skal vi oppleve fjordar og fjell på turen over til Vauldalen. På programmet står blant anna køyretur over vakre Sunnmøre til Femunden og tradisjonsrike Skottgården.
Vi skal bu på nostalgiske Vauldalen Fjellhotell som ligg berre eit par kilometer frå svenskegrensa. Hotellet fungerte tidlegare som turiststasjon for folk som kom over Herjadalen til og frå Sverige, og starta opp som Vauldalen Gard i 1780. Fleire av husa er nyare, men her har dei teke vare på tradisjonane i området, og vi skal få både god mat og spennande aktivitetar.
Femundmarka nasjonalpark vart oppretta i 1971, men heilt sidan 1887 har det gått rutegåande båtar på Femunden. I tidlegare tider var det tømmersleping og godstrafikk som utgjorde størstedelen av trafikken, medan persontrafikken i seinare tid er den viktigaste inntektskjelda. I dag går båtane i rute i sommarhalvåret og er viktig for turismen i området. Vi skal følgje Femunden II for å vitje Femundhytta, som var smeltehytte under Røros koparverk frå 1739 til 1822.
