5. - 11. oktober 2023.
Paris - Melun - Fontainebleau - Giverny - Rouen - Honfleur.
Vi i Fotefar temareiser er svært glade for å kunne tilby eit eksepsjonelt båtcruise på Seinen, den lengste elva i Frankrike. Cruiset startar i Paris og går sørover Seinen til byen Melun før vi snur nordvestover og seglar elva til enden ved den idylliske byen Honfleur ved Côte Fleurie. Vi får oppleve Fontainebleau-slottet, pittoreske Giverny, historiske Rouen, idylliske Honfleur, og i tillegg får vi med oss dei viktigaste attraksjonane i Paris.
Professor Sylfest Lomheim er med på heile turen og lósar oss gjennom ved å ause av sine store kunnskapar om fransk kultur, språk, politikk og historie med særleg fokus på Normandie. Sidan vi går i land kvar dag, vert det gode høve til å koma tett på byliv, landskap og severdigheiter. Sylfest kjenner landsdelen frå innsida, både frå yrkesliv og gjennom si familie-tilknyting.
På elvecruiset vårt bur vi svært godt på Seine Princess, eit hyggeleg, førsteklasses cruiseskip med 67 lugarar som alle er utvendige. Alle lugarar har også bad med dusj, hårtørkar, TV, safe og aircondition. Det er “All inclusive” om bord med nydeleg mat og drikke inkludert. Vi har heile båten for oss sjølve, så dette blir ei unik oppleving med foredrag om bord på båten om føremiddagen og kortare, underhaldande, kåseri frå Sylfest etter middag. Viss vi er heldige, tek han kanskje fram gitaren og spelar og syng litt for oss også.
I foredraga vil Sylfest, mellom anna, fortelja om:
- Gange-Rolv og vikingtida
- den norrøne 'ord-invasjonen' og dei mange stadnamna med norsk-dansk opphav
- dei lange linjene i historia til Normandie
- kjende historiske personar som har levd der, som Jeanne d'Arc og Olav den heilage
- Edith Piaf sitt liv
- Normandie sitt jordbruk og næringsliv
- normannisk mat og drikke (poulet vallée d'Auge, andouilles, camembert, brie, Pont L'Evêque, cidre, calvados, eplekake med krem osv.)
- krig og fred i Normandie
