Katrine Sele, Foto: Bent Are Iversen, Firda

23. - 25. juni 2022.

Nikolai Astrup er rekna som ein av våre aller største kunstmålarar. Han nytta sterke, klåre fargar og henta mange av motiva sine frå den vakre naturen i Jølster der han voks opp på prestegarden. Etter nokre år i inn- og utland slo han seg til for godt i bygda.

Denne jonsokhelga skal vi høyre mykje om kunstnaren Astrup og sjå mange av arbeida hans. Vi besøkjer Astruptunet, heimen hans, som i dag er kunstmuseum. Vidare skal vi til Eikaasgalleriet og møte arbeida til ein anna stor kunstnar frå Jølster, nemleg Ludvig Eikaas.

Jonsokaftan skal vi feire på Jølstramuseet, som er ei lita privat perle av galleri og museum. Her blir det middag, jonsokbål og dans på låven.

Fagguiden på denne turen er forfattar og journalist Katrine Sele, som er busett i Jølster. Ho har skreve biografiar om Oddvar Torsheim og Kenneth Sivertsen. Dei to nyaste bøkene hennar, som ho har fått mykje oppmerksemd for, er Jølster hotell: historier frå eit asylmottak og Einars bok, begge utgitt på Samlaget. Ho er mellom anna tildelt Kulturdepartementets nynorskpris for journalistar i tillegg til både Samlagsprisen og Språkprisen.

Dagsprogram

Dagsprogram Print icon

Atterhald om endringar

Teiknforklaring for måltid inkludert i prisen:
(F) Frukost
(L) Lunsj
(M) Middag
Dag 1: Torsdag 23. juni - Besøk på Astruptunet og Jølstramuseet
Deltakarane møtest på Thon Hotel Jølster på tettstaden Skei innan kl. 12.00. Ein kan komme seg dit med eigen bil eller med buss frå bl.a. Oslo, Bergen, Ålesund og Trondheim. Fleire vil venteleg ta morgonfly frå Oslo, Bergen og andre byar til Førde og så flybuss til Førde. Fotefar vil hjelpe til med tips og råd for transport frå Førde til Skei i Jølster.

Etter innsjekking og lunsj, får vi det første kåseriet av forfattar og journalist Katrine Sele med tittelen: Nikolai Astrup som ein av våre aller fremste kunstmålarar.

Deretter blir det utflukt til Astruptunet som var heimen til Nikolai og Engel Astrup. Dei kjøpte eit lite småbruk på sørsida av Jølstravatnet ved Sandalsstrand. Her bygde han seg eit atelier og rydda og dyrka den bratte jorda i terrassar med både nytteplantar og meir eksotiske vekstar. Nikolai var noko veikhelsa, hadde tuberkulose og sleit heile livet med astma. Til tider misbrukte han også alkohol.

Han døydde i Førde berre 47 år gamal i januar 1928 etter å ha fått lungebetennelse på tur dit i open lastebil. Han let etter seg kone og åtte barn i alderen 2-16 år. Engel var ein dugande tekstilkunstnar og budde på småbruket til ho døydde i 1966. Året før hadde ho selt eigedommen til Jølster kommune. Astruptunet har ei stor samling av arbeida til kunstnaren og mange småhus, og ein lokal guide viser oss rundt og fortel om korleis Nikolai og Engel med barna levde der.

På bussturen til Astruptunet køyrer vi forbi og viser garden Sunde der Engel kom ifrå. Nikolai leigde eit rom der då han arbeidde med det kjende måleriet Kollen, og såleis vart han kjend med Engel. Dei gifte seg då ho var knapt 16 år gamal.

Etter besøket på Astruptunet køyrer bussen oss til Vassenden og Jølstramuseet der. Det er ei lita og privat perle av eit galleri og bygdemuseum som inneheld 14 bygningar med eit stovehus frå 1600-talet. I alt er det samla inn 3000 historiske gjenstandar frå Sunnfjord. Kunstgalleriet har også salsutstilling av lokale og nasjonale kunstnarar som Ludvig Eikaas og Oddvar Torsheim.

Jølstramuseet er kjend for matopplevingar, så her blir det ein utsøkt tre-retters middag, før det blir underhaldning, jonsokbål og dans på låven! Buss tilbake til hotellet vårt på Skei.
(L, M)
Dag 2: Fredag 24. juni - Tur til Ålhus og Eikaasgalleriet
Etter frukost blir det morgonkåseri med Katrine Sele med emnet: Jølster - og motiva i kunsten til Nikolai Astrup.

Etter foredraget køyrer vi med buss til Ålhus. Vi stoppar ved Ålhus kyrkje og ser prestegarden og det nærliggjande området der Astrup fann mange av motiva sine. Han var fødd i Bremanger der faren først var prest, men kom til Jølster som 3-åring og er konfirmert i denne kyrkja. Her er både han og kona Engel gravlagde, og vi kikkar på den enkle gravsteinen deira før vi går inn i kyrkja frå slutten av 1700-talet.

Like ved kyrkja ligg Eikaasgalleriet som inneheld ei stor samling av arbeida til kunstnaren Ludvig Eikaas. Vi går dit, og då er det tid for lunsj. Etter vi har ete, får vi ein introduksjon om Eikaas og kunsten hans. Han er rekna som ein av dei mest markante biletkunstnarane i Noreg i etterkrigstida og var ein av pionerane innan non-figurativ kunst. I tillegg nytta han også meir figurativt formspråk. Eikaas var professor ved Statens Kunstakademi der han også ein periode var rektor. Arbeida hans er representerte i om lag 10 norske kunstmuseum og i fleire utanlandske galleri som i København, New York, Paris og i Uffiz i Firenze.

Han donerte samlinga si til Jølster kommune, og det gamle meieriet på Ålhus vart bygd om til eit moderne kunstgalleri for å huse arbeida hans. Her finn vi også ein del skisser og utkast av Nikolai Astrup som ikkje tidlegare har vore tilgjengelege.

Bussen køyrer oss så tilbake til Skei der vi slappar av før vi får servert ein god middag. Vi avsluttar kvelden på hotellet med å sjå filmen Astrup - Flammen over Jølster på storskjerm.
(F, L, M)
Dag 3: Laurdag 25. juni – Vi besøkjer Sogn og Fjordane Kunstmuseum
Etter frukost får vi det siste kåseriet til Katrine Sele. Emne for dagen: Nikolai Astrup sin kunst i nasjonal og internasjonal kontekst.

Vi køyrer deretter med buss eller privatbilar til Førde og besøkjer Sogn og Fjordane Kunstmuseum som har ei samlinga på over tusen verk, og syner regional og nasjonal biletkunst og kunsthandverk frå 1900-talet og fram til i dag, med hovudvekt på tida etter 1970.

Vi avsluttar dagen og kunstreisa til Jølster på kunstmuseet. Avslutning ca. kl. 14.00 og heimreise.
(F)

Avgangar & prisar

Avreisedato	Avreisestad	Hotell	Ledige plassar	Frå pris
23/6	Skei	Skei Hotel	Meir enn 8	9 990,-	BestillMer informasjon
Les meir om Skei Hotel»

Jonsok i Astrups Jølster med Katrine Sele

Dagsprogram

Dag 1: Torsdag 23. juni - Besøk på Astruptunet og Jølstramuseet

Dag 2: Fredag 24. juni - Tur til Ålhus og Eikaasgalleriet

Dag 3: Laurdag 25. juni – Vi besøkjer Sogn og Fjordane Kunstmuseum

Avgangar & prisar

Databeskyttelsespolitikk for Fotefar Temareiser AS