Vi startar dagen med ein god frukost. Etterpå er tida inne for eit velkomstmøte, og vi får det første kåseriet med vår eminente fagguide: Hans Wilhelm Steinfeld.
Etter kåseriet vil bussen vår hente oss på hotellet og ta oss til den eldste bydelen i Dubrovnik. Her vil vår lokale guide møte oss, klar til å lose oss gjennom dei små gatene innanfor dei imponerande bymurane frå 800-talet. Guiden fortel oss om bombardementet av byen under borgarkrigen på Balkan og atterreisinga etterpå. Gamlebyen i Dubrovnik er så godt restaurert at den har vorte ettertrakta som kulisse for filmproduksjon, og mange storfilmar er tekne opp her. Gjennom denne halvannan times lange turen får vi eit innblikk i historia og kulturen til byen som går under tilnamnet «Adriaterhavets perle». Bussen vår køyrer dei som ønskjer det attende til hotellet, eller du kan forsette å utforske marknadene, musea, kaféane og det yrande folkelivet i ditt eige tempo.
Denne ettermiddagen tilbyr vi ei innhaldsrik ekstrautflukt til den nærliggjande landsbygda Ljuta. Bussen hentar dei påmelde og køyrer ein time sørover mot Konavle distriktet. Her vert vi hjarteleg mottekne av lokale kvinner pynta i distriktets folkedrakt. Gjestfridomen ligg naturleg i det kroatiske folkeslaget, og vi blir bode heimelaga likørar av kirsebær, valnøtt og mispel eller rajika (ein slags brandy) av urter og druer. Her er også turka fiken, sukra sitrusskal og mandlar.
Vi vitjar to av dei lokale vassmøllene her og får eit innblikk i deira historie og funksjon. Møllene er framleis i bruk, og vi får ein demonstrasjon av korleis dei nyttar desse til produksjon av mjøl og tidlegare også stoffproduksjon.
Bussen tek oss så vidare til ein lokal vingard, drive av den same familien gjennom fleire år hundre. Familien har sjølv drive med vinproduksjon sidan 1897 og bygde då ein «vinica» (vinkjellar). Her får vi høyre meir om vinproduksjonen i området og sjølvsagt får vi også smake på varene!
Vi køyrer eit lite stykkje vidare før vi stoppar ved den sjarmerande landsbyresturanten vi skal ete på. Her vert vi møtt av eigaren Niko. Garden har vore i familiens eige i fleire år hundre, noko ein har skriftlege kjelder på frå 1400-talet. Niko er lidenskapeleg oppteken av historie og fortel om landsbylivet før og no. Han viser oss også rundt på garden og i den flotte hagen sin. Vi avsluttar i restauranten her med ein treretters lokal middag med tilhøyrande vin. Etterpå kan vi svinge oss til lokal gitar og trekkspel-musikk. Buss attende til hotellet.
(F)
