13. - 16. November 2025.
Vi held fram med dei opplevingsrike turane saman med vinjournalist og sommelier Merete Bø, og denne gongen til ein stad vi veit mange har ønskt seg, nemleg Toscana. Merete er ein av Norges fremste vinjournalistar, og er ein av to programleiarar i podkasten «Jeg kan ingenting om vin». Merete har også gitt ut ei rekkje bøker om vin, anna drikke og mat.
På denne turen skal vi smake oss gjennom vinane til nokre av Merete Bø sine utvalde produsentar, både store, kjende namn og meir ukjende. Undervegs får vi lære om smaking, jordsmonn og produksjon, alt dette under god rettleiing av Merete. Vi skal møte menneska bak vinane, skal ut på vinmarkene og inn i vinkjellarane, og vi får smake mat som passar godt til det vi drikk.
Vindistriktet Toscana er eitt av dei mest prestisjefylte vinområda i verda, og ligg i det sentrale Italia. Regionen er kjend for sitt bølgjande landskap, sypresser, gamle steinbyar og ikkje minst – vinen. Klimaet er varmt og solrikt med kjølande vindar frå åsane og kysten, noko som gjev gode forhold for druedyrking. Den mest brukte drua frå området er Sangiovese, og av denne vert det laga kjende vinar som Chianti, Brunello og Vino Nobile. I Toscana møtest det gamle og det nye: tradisjonelle familiegardar og moderne vinprodusentar skapar vinar med karakter og eleganse – og mange av dei kan lagrast lenge.
