15. - 19. september 2027.
Belfast har gitt oss musikk som strekkjer seg langt utover gatene der han vart til. Her ligg oppvekstmiljøet som Van Morrison stadig vender tilbake til i songane sine, og her fann Rory Gallagher eit trufast publikum gjennom urolege år. Frå blues og soul til punk og irsk folkemusikk møter me ein by der musikken har levd side om side med industri, politiske motsetnader og store endringar.
På denne reisa blir me betre kjende med Belfast gjennom musikken, menneska og stadene som har forma byen. Me følgjer i spora til Van Morrison og utforskar musikklivet i Belfast og resten av Nord-Irland. Ved Titanic Belfast møter me historia om skipet og forliset, og gjennom songar, filmar og bøker ser me korleis forteljinga har levd vidare. Undervegs blir det tid til vinyljakt, marknadsliv og pubbesøk med levande musikk.
Med oss har me Bård Ose, som med kunnskap, forteljarglede og eit godt øyre for detaljane set opplevingane i samanheng. Foredraga hans gir oss noko å lytte etter og sjå etter når me går ut i byen. Saman med lokale guidar tek han oss med inn i eit Belfast der musikkhistoria og byhistoria stadig kryssar kvarandre.
