31. mai - 3. juni 2027.
Velkommen med på ei reise til vakre Voss og omland i møte med diktarane Per Sivle og Olav H. Hauge. Vi får oppleve landskapet og naturen og høyre historier som har prega diktinga deira. Sivle var fødd i Aurland i Sogn og voks opp ved Stalheim i Vossestrand, medan Hauge budde stordelen av livet på garden sin i Ulvik, nabobygda til Voss. Per Sivle var ein omstridd og folkekjær diktar og folkelivsskildrar. Han er mest kjend for «Den fyrste song», det mektige sogediktet «Tord Foleson» og barneforteljinga «Berre ein hund». Olav H. Hauge vert rekna som ein av dei aller fremste norske lyrikarane i siste halvdelen av 1900-talet. Diktet «Det er den draumen» vart i 2016 kåra til Norges beste dikt gjennom tidene.
Vi er så heldige å ha med oss Gunnstein Akselberg som kåsør og fagguide. Han er sjølv vossing og vil med sine store kunnskapar og sin lune veremåte lose gruppa gjennom turopplegget. Gunnstein er kjend frå Eides språksjov på NRK, og har vore professor i språk og lingvistikk ved universitetet i Bergen.
Under middagane om kveldane blir det deklamasjon av dikta til dei to populære forfattarane, og lokal folkemusikk. I tillegg får vi omvising i den gamle Vangskyrkja, museumsbesøk og utflukter til Sivle Gard og Ulvik.
