16. - 21. august 2026.
Passau - Melk - Wien - Esztergom - Budapest.
Språkdronninga Linda Eide og folkemusikaren Sigrid Moldestad starta sitt samarbeid med det uhøgtidlege kappleikshowet Jaktstart med felebyte, til Landskappleiken på Voss i 2011. Sidan har dei granska både jazzen si historie i melodi grand prix, kåsert over tema som ord på vandring, dialektar i folkemusikken, og elles hatt fleire møter på scena, i skjeringspunktet mellom språklege raritetar og musikalske vandrehistorier.
No tek dei turen saman med oss, til elva over alle elvar; Donau.
For det er ikkje berre den klassiske musikken frå Sentral-Europa som har påverka oss nordmenn. Også folkemusikken vår er prega og inspirert av kulturområda langs Donau, og desse områda er igjen inspirert av denne mektige elva. Medan elvebåten siglar si ferd til kulturelle og musikalske stoppestader syner Eide og Moldestad overraskande bindeledd til i musikken vi ser på som typisk norsk, og gir deg eit skråblikk på klassiske komponistar. Og i god Donau-ånd blir det både musikk, poesi og språklege blomar langs elvebreidda, og ganske sikkert ein tur innom jodlingas sjel. Alt knytt i hop med uhøgtidleg varme og sjarme – og ein ørliten dæsj Melodi Grand Prix! (Sigrid Moldestad har jo tross alt deltatt i den internasjonale finalen, med hardingfela!)
På elvecruiset vårt bur vi svært godt på MS France (4 stjerner). Alle måltida om bord med drikke er inkluderte. Vi har heile båten berre for Fotefar, så dette blir verkeleg ei unik kulturell og musikalsk oppleving på mektige Donau.
