Skip to main content

Andrea Bocelli i heimbyen Lajatico

15. - 19. juli 2024.

Grøne åssider, vakre landsbyar og gode smakar kjenneteiknar Toscana. Kvart år inviterer den verdskjende tenoren og operasongaren Andrea Bocelli til utandørs operakonsert i heimbyen sin Lajatico. 2024 er også året der Bocelli feirar 30 som artist.

Fotefar gjentek suksessen frå 2023, og inviterer deg til å dele denne musikalske opplevinga saman med oss. På turen skal vi bu i mellomalderbyen San Miniato, som ligg i hjarta av Toscana. Byen har eit hyggeleg sentrum med mange kaféar og butikkar, blant anna finn du trøffelbutikk her. Byen og området rundt har stort fokus på såkalla «Slow Food», altså lokal mat dyrka i nærleiken og laga med tradisjonelle oppskrifter. Her får vi smake på ekte toskanske matrettar med lang historie i regionen.

I tillegg til konserten med Bocelli får du høve til å oppleve renessansebyen Firenze, og vi skal vitje ein vingard som ligg vakkert til i det toscanske landskapet.

 

 

 

Søk

Dagsprogram

  • Atterhald om endringar

    Teiknforklaring for måltid inkludert i prisen:
    (F) Frukost
    (L) Lunsj
    (M) Middag

  • Dag 1: Måndag 15. juli - Velkommen til San Miniato

    Avreise frå Bergen om ettermiddag, med direktefly til Firenze. Avreise frå Gardermoen med fly til Firenze (mellomlanding). Frå flyplassen køyrer vi i retning San Miniato, som ligg i provinsen Pisa i Toscana. Her skal vi bu medan vi er i denne regionen. Det bur om lag 30 000 innbyggarar i byen, og dei kallar seg for «samminiatesi». Den vesle byen var først nemnd då langobardar bygde eit kapell her rundt år 800, til ære for helgenen San Miniato. Området er spesielt kjent for trøflar, god mat og vin, så her kan vi verkeleg leve det gode liv.

    Framme i San Miniato blir gruppa fordelt på to hotell. Etter innsjekkinga er det mogeleg å vere med reiseleiar ut på ein rusletur for å bli litt kjend i byen.  Under mellomalderen låg San Miniato strategisk til langs vegen, Via Francigena, som på den tida knytte Europa saman med Roma.  Denne ferdselsvegen starta i England og gjekk gjennom både Frankrike og Sveits til Roma. Arkeologiske utgravingar viser at det i området har vore busetnad her heilt tilbake til den eldre steinalder.

    Denne dagen har vi ankomst til litt uike tider, så det vert middag på eiga hand. Reiseleiar kjem gjerne med tips restaurantar.

  • Dag 2: Tysdag 16. juli - San Miniato og Firenze

    Etter ein god frukost, står ein fritt til å bruke tida i San Miniato eller ein kan bli med reiseleiar på ei utflukt inn til Firenze (mogleg val, mot tillegg i pris).

    Firenze er den største renessanse- og kunstbyen i Italia, og her vert vi møtt av ein skandinavisktalande guide for ei byvandring. Byen har mange flotte bygningar og elva Arno renn gjennom byen. På vandreturen gjennom byen skal vi blant anna få sjå den praktfulle katedralen Santa Maria del Fiore, lokalt kalla Il Duomo. Vi skal også innom den unike og vakre Basilica di Santa Croce, der blant anna Michelangelo ligg gravlagd. Firenze er ein koseleg by å spasere rundt i, og vi skal sjølvsagt gå over brua Ponte Vecchio. Vi avsluttar vandreturen med lunsj på ein hyggeleg restaurant.

    Etter lunsj er det tid på eiga hand. Då er det mogeleg å besøke Uffizi, eit av dei eldste og største kunstgalleria i verda. Her er det måleri og skulpturar frå mange store kunstnarar, blant anna frå Raffaello, Michelangelo og Caravaggio.

    Elles har Firenze eit yrande gateliv og ein stor marknad – særleg med skinnvarer. Dei som ønsker det, kan gå saman med reiseleiar.

    På ettermiddagen køyrer vi tilbake til San Miniato. Pris på utflukta til Firenze er kr. 1595,- pr. person.
    Felles middag på hotel Miravalle.
    (F, M)

  • Dag 3: Onsdag 17. juli - Vandretur i San Miniato og Andrea Bocelli-konsert

    Etter ein god frukost kan dei som vil, bli med reiseleiar på ein vandretur i San Miniato. Mellomalderbyen kan by på Catedrale di Santa Maria Assunta e di San Genesio, ein vakker utsmykka katedral med interiør inspirert frå nyrenessanse og barokk. Oppe frå tårnet Federico kan ein nyte ein av dei flottaste utsyna over området. Når det nærmar seg tid for lunsj, samlast vi for ein rusletur til ein lokal restaurant. Restauranten ligg i utkanten av byen, om lag 2 km å gå ein veg. Restauranten star oppført i Guide Michelin (utan stjerne), er fint vedlikehalden og har ein god og varm atmosfære. Her får vi smake på moderne mat med røter langt tilbake i dei lokale tradisjonane.

    Etter ein behageleg og lang lunsj, vert vi henta med bussen og køyrd tilbake til hotellet. Her får vi høve til å skifte og gjere oss klare for kvelden med konsertopplevinga i Lajatico. Konserten byrjar ikkje før 21.30 på berømte Teatro del Silencio. Konserten varer til midnatt, og vi er tilbake til hotellet ute i dei små nattetimane.

    Arrangøren tek atterhald om veret og konserten kan bli flytta frå den 17.juli til den 18. juli i tilfelle uver. Arrangøren refunderer ikkje billettane om konserten vert avlyst.
    (F, L)

  • Dag 4: Torsdag 18. juli - Utflukt med vingardsbesøk

    Fulle av inntrykk etter opplevingane i går, har vi i dag berekna litt ekstra god tid til frukosten. Etter frukosten blir vi henta med buss for utflukt med omvising på ein lokal vingard. I vakkert toskansk landskap, blir vi møtt av vertskapet for omvising og vinsmaking. Vi skal også ete lunsj her.

    Tilbake i San Miniato har vi ettermiddagen til fri disposisjon. Reiseleiar kjem gjerne med tips til aktivitetar her.

    Om ein vil oppleve andre tettstadar rundt San Miniato, er både småbyen Vinci og den større byen Pisa innanfor rekkevidde med offentleg transport. Vinci er fødestaden til renessansegeniet Leonardo da Vinci, og her kan ein besøke museet om han og dei utruleg oppfinningane hans. Det er mogeleg å gå tur frå sentrum og opp til gardshuset der han vart fødd. Huset ligg om lag 3 km frå sentrum, opp i åsen. Heile turen går på fin grusveg. Vinci har også fleire små koselege restaurantar og serveringsstader.

    Handelsbyen Pisa er verdskjend for det skeive tårnet og ligg ved den same elva som Firenze, Arno. I Pisa kan du vandre i gamlebyen, vitje ein rekke museum, i tillegg til å kikke på Det skeive tårnet. Den vakre katedralen Duomo di Pisa bør også nemnast.

    Middag denne kvelden er på eiga hand. Reiseleiar kjem gjerne med gode forslag.
    (F, L)

  • Dag 5: Fredag 19. juli - Heimreisedag

    Etter ein tidleg frukost køyrer bussen oss til flyplassen i Firenze for turen heim. Fly til Bergen og Oslo.
    (F)

Avgangar & prisar

AvreisedatoAvreisestadHotellLedige plassarFrå pris
15/7BergenToscanaFullbooka, venteliste21 950,-Book på ventelisteMer informasjon
15/7OsloToscanaFullbooka, venteliste23 950,-Book på ventelisteMer informasjon
15/7San MiniatoToscana
Utan fly
Fullbooka, venteliste16 950,-Book på ventelisteMer informasjon
Reisekalender
10/4Champagne med Merete BøFrå 24 950,-
10/4Champagne med Merete BøFrå 23 950,-
10/4Champagne med Merete BøFrå 21 550,-
Kontakt oss
Våre telefontider er 09.00 til 12.00.
Adresse:
Fotefar Temareiser AS
Sognefjordvegen 40
6863 Leikanger
  • RGF Logo