10.-18. Februar 2026.

Bli med på tur til Egypt og båtreise på Nilen saman med ein av verdas fremste ekspertar på elvas historie, Terje Tvedt. Den siste boka hans, Nilen – historiens elv, fekk strålande kritikkar. Ho vart ein bestseljar og er omsett til mange språk, blant anna til arabisk. Mange har sikkert sett dokumentarfilmen hans på NRK, Kampen om Nilen. Han vil halde ei foredragsrekke om ei fascinerande reise i fortid og notid om den mest sagnomsuste av alle store sivilisasjonsskapande elvar.

Vi både startar og avsluttar denne eventyrlege reisa vår i Kairo, der vi får oppleve fleire av Egypt sine kulturskattar. Her skal vi besøke det nyopna Grand Egyptian Museum, der dei presenterer ei stor samling av gjenstandar og forteljingar frå oldtida. Vi skal også besøke dei imponerande pyramidane i Giza. I tillegg kan dei som ønsker det, få høve til å bli med på ei spanande dagsutflukt til Alexandria, hamnebyen ved Middelhavet. Dette er ein by i utvikling, og ein vil oppleve ei blanding av gammalt og nytt.

Frå Kairo tek vi flyet sørover til Luxor og går om bord i elvebåten vår, MS Jaz Jubilee. På denne delen av turen ventar fleire storslegne tempel, vi skal besøke dei imponerande gravene i Konganes dal og beundre dei majestetiske Memnonstatuane. På reisa vidare oppover Nilen har vi heile skipet for oss sjølve, og undervegs får vi gleda av å lytte til lærerike og engasjerande forelesingar frå Terje Tvedt om Nilen si historie og kulturelle betydning.

Dagsprogram

Dagsprogram Print icon

Atterhald om endringar

Teiknforklaring for måltid inkludert i prisen:
(F) Frukost
(L) Lunsj
(M) Middag
Dag 1: Tysdag 10. februar - Framkomst Kairo
Fly frå Gardermoen til Kairo (tid kjem seinare). Bussen køyrer oss til hotellet vårt i sentrum av Kairo. Då reisene vil vere litt ulike for folk, er det ikkje lagt opp til noko program denne dagen.
(mat på fly)
Dag 2: Onsdag 11. februar - Kairo og pyramidane
Dagen startar med ein god frukost på hotellet før vi skal få oppleve Kairo og pyramidane. Først går turen til Giza, 25 kilometer utanfor Kairo for å besøke det nye egyptiske museet. Her får vi tid til å fordjupe oss i tusenvis av år med egyptisk historie gjennom ei imponerande mengd gjenstandar frå faraoane si tid. Dette er verdas største samling av oldsaker og mumiar frå det gamle Egypt, der Tutankhamon si gylne maske av 12 kilo gull er ein av dei mest kjende attraksjonane.

Vidare får vi oppleve dei storslegne pyramidane, og den kjende Sfinxen i Giza. Felles lunsj denne dagen. Buss tilbake til hotellet seint på ettermiddagen.

Om kvelden får vi den første forelesninga til Terje Tvedt om rolla og historia til verdas mest kjende elv. Han vil spørje: Kvifor er «Egypt, pyramidenes land» blitt kalla «ei gåve frå Nilen» og kva er det spesielle ved den mest kjende elva på kloden? Professor Terje Tvedt har forska på Nilen i over 30 år. Elva er livsviktig for millionar av menneske der den renn gjennom 11 land. Men elva er også ei kjelde til krig, konflikt og kamp om ressursane. I rekka av forelesingane til Terje Tvedt på denne blir vi med på ei fantastisk reise i den mektige elva si historie og i notid. Elva har alltid vore i sentrum for storpolitikken. Her har både Tutankhamun, Cæsar, Churchill, Nasser og Bin Laden skapt verdshistorie, og i framtida kjem kampen om vatnet til å bli enno meir intensiv.

Middag om kvelden på eiga hand, spør gjerne reiseleiarane om tips.
(F, L)
Dag 3: Torsdag 12. februar - Kairo til Luxor
Etter ein tidleg frukost / matpakke, tek bussen oss til flyplassen i god tid før avreise med fly til Luxor.

Framme i Luxor hentar bussen oss på flyplassen og tek oss til Karnak, eit monumentalt og 4000 år gamalt tempel-kompleks. Dette området vart rekna som det mest heilage i Egypt i oldtida, og er utruleg å få oppleve med sine gigantiske søyler og store utstrekning. Etter dette sjekkar vi inn på cruisebåten MS Jaz Jubilee, som blir heimen vår dei neste dagane. Båten er utstyrt med restaurant, bar og eit stort soldekk med symjebasseng og høve til å trene, så her kan vi verkeleg ha fine dagar. Vi nyt vår første lunsj om bord før det blir eit nytt foredrag med Terje Tvedt med tittelen Nilen som verdas geografiske gåte nummer éin.

Denne ettermiddagen er det tid for ein stemningsfull tur for å utforske Luxor-tempelet. Dette vert opplyst når mørket fell på og er ei stor oppleving å få med seg. Vi kan også anbefale ein rusletur på strandpromenaden, den såkalla «cornichen» som også er ein fin måte å sjå byen og folkelivet. Kvelden avsluttar vi med felles middag om bord på båten.

For dei som ønsker endå meir denne dagen, kan ein rusle til det ikoniske Winter Palace. Dette ærverdige hotellet var bygd i 1886, og brukt som vinterresidens for den egyptiske kongefamilien, i tillegg til å ta imot europeiske kongelege, adelsmenn og elles velståande turistar som besøkte Luxor. Her budde også Henrik Ibsen då han vart invitert til opninga av Suez kanalen i 1869. Av andre kjende hendingar vart hotellet brukt som filmkulisser i Poirot sin «Døden på Nilen», og det var her Howard Carter kunngjorde oppdaginga av Tutankhamon si grav i 1922.
(F, L, M)
Dag 4: Fredag 13. februar – Luxor
Denne dagen byr på eit mangfald av opplevingar. Allereie tidleg om morgonen er det nokon som skal opp før soloppgang for å delta på ein valfri luftballongtur over Luxor med spektakulær utsikt over det majestetiske landskapet (mogeleg val, mot tillegg i prisen). Desse får med seg frukost-boks frå båten.

Etter denne luftige og minnerike opplevinga samlast dei att, saman med resten av gjengen for turen til Kongenes Dal, Hatshepshut-tempel og ein stopp ved Memnon-statuane.

Tilbake på båten samlar vi oss for å nyte ein nydeleg lunsj. Denne ettermiddagen seglar vi mot Esna og slusene der. Før middag blir det foredrag med Terje Tvedt: Nilen som verdens geografiske gåte nummer én.
(F, L, M)
Dag 5: Laurdag 14. februar - Edfu og Kom Ombo
Om du har lyst å nyte ein dag på soldekket, ved bassengkanten eller med ei god bok i skuggen av parasollane, er dette dagen for det. Om du heller vil oppleve meir av det historiske Egypt, kan du vere med på eit besøk på det storslegne Horus-tempelet i Edfu, eitt av dei best bevarte templa i heile Egypt og for mange ein viktig stopp. Hest og kjerre er framleis eit mykje brukt framkomstmiddel i denne delen av verda, og denne dagen vil vi nytte dette på turen gjennom byen til Horus-tempelet. Dette tempelet, dedikert til falkeguden Horus, imponerer med sine detaljerte skulpturar og komplekse design (mogeleg val, mot tillegg i prisen).

Tilbake på båten blir det nytt foredrag med Terje Tvedt før lunsj: Fra faraoenes tid til det britiske Nil-imperiet. Medan vi et lunsjen vår, seglar vi mot Kom Ombo, og etter lunsjen kan vi fortsette å nyte sola på dekk, og har god tid til å ta inn det særeigne landskapet langs Nilen. Utsynet har endra seg lite gjennom tidene, og landbruket blir framleis drive etter tradisjonelle metodar.

På ettermiddagen stoppar vi ved Kom Ombo-tempelet (inkludert i turprisen), eit særeige dobbelttempel dedikert til gudane Sobek og Horus. Tempelet ligg ved krokodilleguden Sobek sitt sakrale kompleks og museet for krokodillemumiane.

Denne dagen stiller reiseleiarane i Galabaia-antrekk til middagen, og det er kjekt om fleire har lyst å gjere dette (ingen tvang). Vi avsluttar kvelden med noko godt i glaset, gjerne på dekk!
(F, L, M)
Dag 6: Søndag 15. februar – Fritid i Aswan eller utflukt til Abu Simbel
I dag ventar nye eventyr, og for nokre av oss startar dagen litt ekstra tidleg for å utforske dei majestetiske Abu Simbel-templa (mogeleg val, mot tillegg i prisen). Det er avreise tidleg (!) morgon, og vi køyrer gjennom ørkenen til Abu Simbel. Utflukta varer i om lag 8-9 timar.

Dei som ikkje er med på denne utflukta, kan nytte dagen på eiga hand i Aswan. Reiseleiarar vil vere tilgjengeleg på båten denne dagen. Vi har blant anna sett opp ein avslappande felucca-segltur (mogleg val, mot tillegg i prisen) som alternativ til aktivitet her. Kanskje vil nokon opp å sjå det historiske Old Cataract Hotel, der både Winston Churchill og Agatha Christie har budd (ikkje inkludert).

Vi et lunsj om bord på båten midt på dagen før ettermiddagen byr på ny valfri aktivitet. Før middag blir det eit nytt foredrag med Terje Tvedt: Menneskets årtusen lange kamp for å gjere seg til Nilens behersker. Kvelden vert avrunda med felles middag.
(F, L, M)
Dag 7: Måndag 16. februar – Aswan til Kairo
Etter ein god frukost sjekkar vi ut frå elvebåten. Før flyet vår går til Kairo på ettermiddagen, ventar nye opplevingar i Aswan. Vi besøker først den storslegne Aswandammen, ein imponerande ingeniørprestasjon som har forma landskapet og liva til folka her på godt og vondt. Deretter tek vi turen innom det store steinbrotet, der vi kan læra meir om den intrikate kunsten å forme og skape monumentale obeliskar. Her ligg framleis verdas største obelisk, nesten ferdig utforma. Vi skal ete lunsj i Aswan før vi på tidleg ettermiddag dreg til flyplassen for fly tilbake til Kairo. Vi sjekkar inn på hotellet vårt i Kairo. Denne dagen er det middag på eiga hand.
(F, L)
Dag 8: Tysdag 17. februar – Valfri dagstur til Alexandria
Denne dagen kan du velje å bruke tida på eiga hand i Kairo sentrum eller på hotellet, eller du kan bli med på dagstur til den historiske byen Alexandria (mogeleg val, mot tillegg i prisen). I Alexandria skal vi besøke katakombene ved Kom El Shoqafa. Detter underjordiske gravanlegget, hogge ut i fjellet ein gong i dei første hundreåra etter Kristus. Når ein stig ned dei spiralforma trappene, kjem ein til labyrintane der gravkammera ligg, og dei er pynta med relieff og dekorasjonar. Her finn ein sarkofagar, gravnisjar og utsmykkingar som fortel historia om dei gamle rituala, dei dødes reise til livet etter døden. Dette skildrar Alexandria si rolle som eit kulturelt og religiøst knutepunkt i antikken. Eit besøk i katakombene ved Kom El Shoqafa er ei reise tilbake i tid og eit sterkt møte med dei skjulte skattane frå ein historisk epoke – ei oppleving som gjer djupt inntrykk og set varige spor.

Etterpå besøker vi Bibliotheca Alexandrina, ein moderne rekonstruksjon (teikna av Snøhetta) av det legendariske Alexandriabiblioteket som vart øydelagt i år 391 e.Kr. Felles lunsj på ein lokal restaurant I Alexandria for dei som har meldt seg på dagsutflukta. Turen til Alexandria varer om lag 10 timar.

Tilbake i Kairo får vi eit siste foredrag med Terje Tvedt, Nilen i myter og religionar. før vi avsluttar kvelden med felles middag.
(F, M)
Dag 9: Onsdag 18. februar – Heimreise
Fly til Kairo og derifrå fly tilbake til Norge. Tidspunkt for flyreisene kjem seinare.
(F, mat på fly)