Skip to main content
Heim » Turar 2026 » Musikk-cruise til England, Irland og Nord-Irland med Bård Ose og Finn Tokvam

Musikk-cruise til England, Irland og Nord-Irland med Bård Ose og Finn Tokvam

21. - 26./27. april 2026. 

Birmingham - Dublin - Belfast - Liverpool. 

Velkommen med på eit eineståande musikk-cruise til dei britiske øyane. I vår gjekk radioprogrammet Populærmusikk ispedd litt sladder for siste gong på NRK P1. Det populære laurdagsprogrammet med Bård Ose og Finn Tokvam er over etter 22 år, men no kan du oppleve dei live på ei fantastisk reise til England, Irland og Nord-Irland, der vi besøker fire av dei mest ikoniske musikkbyane i Storbritannia.

Vi startar med fly til London og buss til Birmingham der det blir guida musikkvandring før vi går om bord i cruiseskipet Ambition dagen etter. Derifrå går ferda til Dublin i Irland, vidare nordover til Belfast i Nord-Irland, og så austover til Liverpool, der vi går i Beatles sine fotefar.

Det blir spennande musikkbyar, morosame musikalske anekdotar (ispedd litt sladder) frå Bård og Finn, livemusikk, guida turar og mykje anna å oppleve. Det er berre å glede seg!

[ Lukk ]
Søk

Bildegalleri

Om skipet

Ambition

Vi seglar med skipet Ambition. Det har 680 gjestelugarar med senger til 1200 passasjerar. Det vart bygd i 1999 med siste oppussing i 2023, og har 10 gjestedekk og 6 heisar. Om bord finn vi noko for ein kvar smak både i restaurantar, barar, salongar og underhaldning. Det er butikkar, diskotek, handverksrom, bibliotek, treningssenter og spa-avdeling.

Ein god del av passasjerane reiser med Fotefar. Vi blir mange som reiser for å sjå denne fantastiske reiseruta og høyre foredraga saman.

Viktig informasjon:

På havcruise er vi usett for vêr og andre uforutsette hendingar. Skulle noko oppstå, reserverer reiarlaget seg retten til å endre seglingsrute, tider og program. Det blir ikkje gitt refusjon for slike endringar i programmet.

Dagsprogram

  • Atterhald om endringar
    Teiknforklaring for måltid inkludert i prisen:
    (F) Frukost
    (L) Lunsj
    (M) Middag

  • Dag 1: Tysdag 21. april - Fly til London og buss til Birmingham

    Avreise til London frå Oslo og Bergen. Tilslutning frå andre byar på førespurnad. Bussen vår tek oss frå flyplassen til hotellet vårt i Birmingham (for dei som kjøper reisa med fly), der vi blir betre kjende med kvarandre før vi startar sjølve cruiset. Birmingham er Storbritannias nest største by med 1,1 millionar innbyggjarar, og har ei rik musikkhistorie.

    Middag på hotellet, eller på ein koseleg restaurant i nærleiken.

  • Dag 2: Onsdag 22. april - Birmingham og cruisebåten Ambition

    Etter frukost på hotellet får vi det første liveshowet med Bård og Finn. Birmingham er ein av dei viktigaste engelske musikkbyane med Black Sabbath og Electric Light Orchestra (ELO) som dei mest kjende banda, og etter showet er det mogeleg å melde seg på ekskursjonar (mot tillegg i prisen) til dei mest kjende musikalske attraksjonane i byen. Meir detaljar om dette kjem seinare.

    Etterpå har vi litt tid til å sjå oss om i nærområdet før bussen køyrer oss til cruiseskipet. Båten går frå kaien i Portsmouth kl. 17:00 om ettermiddagen, og vi må vere ute i god tid. Skipet vårt, Ambition, er nyoppussa i 2023 og tilbyr ei tradisjonell britisk cruiseoppleving med ein uformell og vennleg atmosfære. Dei fleste av dei andre på skipet er engelske turistar.

    Etter avgang frå Portsmouth får vi eit nytt UtePILS-show frå Finn og Bård. Om kvelden møtest vi i restauranten til den første middagen om bord. Vi har våre eigne bord, og kan nyte maten medan skipet seglar vestover langs Englands sørkyst.
    (F, M)

    Onsdag 22. april - Birmingham og cruisebåten Ambition

  • Dag 3: Torsdag 23. april - Ein dag til sjøs - Langs sørkysten av England og inn i Irskesjøen

    Denne dagen er vi på sjøen heile tida, og etter frukost får vi eit nytt UtePILS-show av Bård og Finn.

    Det blir god tid til slappe av og nytte seg av alle fasilitetane på skipet. I tillegg til den store salen som viser show på kveldane, finst det shoppingsenter, bibliotek, arts/crafts-rom, utandørs gåløype og rom for kortspel om bord. Der er også fleire kaféar og barar på skipet, og vi finn oss ein «stamkafé» der ein kan treffe kvarandre gjennom dagen. Det er heilpensjon om bord, så alle måltid på skipet er inkluderte i turprisen. Spa-tilbod finst også på Ambition, med sauna, dampbad og frisør, i tillegg til utandørssymjebasseng og badestampar.

    Før middag møtest vi til eit nytt liveshow med Finn og Bård. Tema kjem seinare.
    (F, L, M)

  • Dag 4: Fredag 24. april - Dublin

    Vi har heile dagen i hamn. Her er det mogeleg å melde seg på utflukter (mot tillegg i prisen) til fleire legendariske plassar i musikkhistoria.  Vi kan spesielt anbefale eit besøk på Windmill Lane Studios. Dette studioet var først kjent som innspelingsstad for irsk tradisjonsmusikk, men etter kvart har både Van Morrison, Sinéad O’Connor, Elvis Costello, The Rolling Stones, The Cranberries, Metallica, Status Quo, Kate Bush og Clannad spelt inn plater her. Mest kjent er nok studioet likevel for at det er svært mykje brukt av U2.

    Vi kan også anbefale ein guida vandretur (mot tillegg i prisen og på engelsk) med fokus på historia til Dublin. Vi startar frå hotellet og går til St. Stephen’s Green via ei av Dublins georgianske gater der vi får høyre om livet her på 1700-talet. Vidare får vi høyre om påskeopprøret i 1916, Wolfe Tone og hungersnøda. Vi passerer blant anna arkeologimuseet, parlamentet, Kildare Street Club, Trinity College, Molly Malone-statua og Dublin Castle.

    Viss ein verkeleg vil lære meir om irsk musikkhistorie dei siste 50 åra, bør ein unne seg ei utflukt (mot tillegg i prisen og på engelsk) til The Irish Rock’n Roll Museum, som tek for seg den irske rock- og pophistoria, og korleis den irske tradisjonsmusikken har påverka banda. Musikarar som The Chieftains, The Waterboys, Clannad, Enya og Gary Moore har teke med seg folkemusikken inn i populærmusikken og gjort irsk tradisjonsmusikk kjend overalt. Irsk rock har hatt enorm suksess verda over med blant andre Thin Lizzy, Van Morrison, Rory Gallagher og U2. Elles har nyare popmusikk som Westlife og Boyzone dominert hitlistene.

    Ein kan også shoppe eller slappe av med ein kopp kaffi eller ein Guinness på irsk pub. Reiseleiaren kjem til å komme med forslag på kva ein kan gjere desse timane. Vi tilrår bland anna eit besøk på det verdskjende Guinness-bryggeriet. Sjølv om det er mange turistar innom portane der, er det likevel ei oppleving.
    (F, L, M)

    Fredag 24. april - Dublin

  • Dag 5: Laurdag 25. april - Belfast

    Skipet seglar inn mot austkysten av Nord-Irland, og vi får auge på to store, gulmåla kraner kalla Samson og Goliath. Desse landemerka er ei påminning om skipsbyggingsindustrien som sette Nord-Irland sin hovudstad på kartet.

    Belfast har eit rikt musikkliv, og dei mest kjende som starta karrierane sine på 60- og 70-alet er kanskje Van Morisson, Gary Moore og Stiff Little Fingers. Vi legg opp til valfrie, guida musikkturar (mot tillegg i prisen) med lokalguidar også denne dagen. Program kjem seinare.

    Ei anna utflukt ein kan få med seg, er eit besøk på det fantastiske opplevingssenteret Titanic Belfast (mot tillegg i prisen, meir informasjon om pris og påmelding får de nærmare reise). Det verdskjende skipet vart bygd her i Belfast, og opplevingssenteret med ni etasjar gir oss ei sterk oppleving av skipet og den lagnadstunge overfarten til Amerika. Heile interiøret med salongar og ballsalar er rekonstruerte i full storleik, så her får vi ei kjensle av å vere med på overfarten for over 100 år sidan. Vi går også gjennom dei same portane som passasjerane gjekk gjennom den gongen og får elles sjå mange gjenstandar frå skipet.

    Ein kan også utforske byen på eiga hand, og då kan ein ta ein tur til Donegall-kvartalet, som er eit landemerke i Belfast. Her finn vi mange flotte bygningar i viktoriansk stil. I tillegg er operahuset ein av dei største attraksjonane i byen.

    Vi kjenner alle til konflikten mellom katolikkane/nasjonalistane og protestantane/lojalistane. Det som kjenneteiknar denne konflikten, er at det som i første omgang var ein politisk strid om nasjonalitet, også har sterke religiøse undertonar. For å unngå open strid, vart det oppretta sperringar mellom bydelane der dei to gruppene budde. Vi kan sjå veggmåleria frå denne tida både i katolske Falls Road og protestantiske Shankill Road. Etter at IRA gjekk med på våpenkvile midt på 90-talet, har byen stått fram som eit trygt og spennande reisemål.

    Før middag om bord i skipet blir det eit nytt liveshow med UtePILS. Denne gongen blir temaet Belfast-musikken og den fantastiske musikkbyen vi vaknar opp til i morgon – Liverpool!
    (F, L, M)

    Laurdag 25. april - Belfast

  • Dag 6: Søndag 26. april - Liverpool

    I løpet av natta har skipet kryssa Irskesjøen og segla inn munningen av elva Mersey.

    Liverpool er ein storby som har mykje spennande å sjå og oppleve.

    Vi kan spesielt anbefale The Beatles Story. På dette svært gode museet får vi høyre om heile Beatles si historie, frå før dei slo gjennom til tida etter gruppa vart oppløyst. Det ligg dessutan ved det restaurerte hamneområdet Albert Dock, som er blitt eitt av dei vakraste strøka i Liverpool etter restaureringa. Her er det også mange restaurantar og barar. Vi kan også anbefale det maritime museet ved hamna. Det er ein del av National Museums og har mange ulike utstillingar om Liverpool som sjøfartsby. Ingen britisk by var så viktig for sjøfarten som Liverpool frå 1600-talet og heilt fram til våre dagar. På museet er det også ei avdeling om Titanic, som var registrert i Liverpool.

    Dei som har kjøpt turen med ei ekstra natt i Liverpool, kan melde seg på ein utflukt (mogeleg val, mot tillegg i prisen), den store Beatles-turen med buss rundt i Liverpool. Lokalguiden vår tek oss med til dei kjende Beatles-attraksjonane som Penny Lane, magiske Strawberry Fields og fleire andre stader med tilknyting til The Beatles. Vi får også oppleve det nye infosenteret ved Strawberry Field, og vi besøkjer St. Peter’s Church i Woolton, kyrkja der Lennon og McCartney møttest for første gong.

    Om kvelden anbefaler reiseleiarane koselege restaurantar ved hotellet for dei som har tatt ei ekstra natt i byen. Etterpå tek vi kanskje ein pint på The Grapes Pub der The Beatles brukte å møtast. Dei som vil vere lengre ute denne kvelden, kan teste rockefoten på The Cavern Club eller på ein av dei andre utestadene i Mathew Street. Ein ny bar (Sgt Peppers) med Beatles-tema har opna i den kjende utelivsgata. Her er det både restaurant, eit Beatles-museum og ein konsertstad med coverband som spelar Beatles-musikk, så det kan også vere eit godt alternativ.
    (F)

    Søndag 26. april - Liverpool

  • Dag 7: Måndag 27. april - Valfri ekstra dag i Liverpool

    Dei som har valt å utvide musikkturen med ein dag, får ekstra tid til å oppleve sjarmerande Liverpool.

    Det blir truleg mogeleg å melde seg på Beatles-utflukt også denne dagen (mot tillegg i prisen). Detaljert program for desse utfluktene kjem seinare.
    (F)

    Måndag 27. april - Valfri ekstra dag i Liverpool

  • Viktig informasjon


    • Norske borgarar må ha ein godkjend ETA-søknad (Electronic Travel Authorization), innreiseløyve, for innreise til Storbritannia. Søknaden fyllast ut av den reisande sjølv, på nettet (Apply for an electronic travel authorisation (ETA) - GOV.UK) eller i ein app (UK ETA). Løyvet er gyldig i to år, eller kortare om passet sin gyldigheitstid er kortare enn to år.

    • Dersom du har rørslehemmingar, avklar med oss om denne turen er egna for deg.


Kart

AvreisedatoAvreisestadHotellLedige plassarFrå pris
21/4BergenAmbitionMeir enn 825 950,-BestillMer informasjon
Les meir om Ambition»
21/4BergenAmbition
Ekstra dag i Liverpool
828 400,-BestillMer informasjon
Les meir om Ambition»
21/4OsloAmbitionMeir enn 824 950,-BestillMer informasjon
Les meir om Ambition»
21/4OsloAmbition
Ekstra dag i Liverpool
Meir enn 827 400,-BestillMer informasjon
Les meir om Ambition»
21/4LondonAmbition
Utan flyreise
Meir enn 821 950,-BestillMer informasjon
Les meir om Ambition»
21/4LondonAmbition
Utan flyreise. Ekstra dag i Liverpool
Meir enn 824 400,-BestillMer informasjon
Les meir om Ambition»
Reisekalender
24/5Vin og vandring i ToscanaFrå 19 950,-
24/5Vin og vandring i ToscanaFrå 15 700,-
26/5Fantastiske Færøyane med Dag LindebjergFrå 26 950,-
26/5Fantastiske Færøyane med Dag LindebjergFrå 25 950,-
26/5Fantastiske Færøyane med Dag LindebjergFrå 29 400,-
Kontakt oss
Telefon: 918 20 304
Våre telefontider er 09.00 til 12.00.
E-post: post@fotefartemareiser.no
Adresse:
Fotefar Temareiser AS
Sognefjordvegen 40
6863 Leikanger
Kontaktskjema
  • RGF Logo
Powered by Travelize